Павлов Сергей Лукиянович (18.06.1955)

Журналист, чӑваш ҫыравҫи, СССР журналисчӗсен пӗрлешӗвӗн членӗ (1980), Раҫҫей писателӗсен пӗрлешӗвӗн членӗ (1997), Чӑваш Республикин культурӑн тава тивӗҫлӗ ӗҫченӗ (2001), Ҫ. Элкер ячӗллӗ преми лауреачӗ (2003), Фатих Карим ячӗллӗ преми лауреачӗ (2009), чӑваш халӑх писателӗ (2013).

1955 ҫулхи ҫӗртме уйӑхӗн 18-мӗшӗнче Канаш районӗнчи Ушанар ялӗнче ҫуралнӑ.

Сергей Лукиянович Павлов 1977 ҫулта Чӑваш патшалӑх университетне пӗтернӗ, каярахпа Комсомолӑн Мускаври аслӑ шкулӗнче тата Обществӑлла наукӑсен академийӗнче политолога вӗреннӗ. "Молодой коммунист", "Ульяновец" хаҫатсен редакторӗ пулнӑ, Чӑваш патшалӑх телерадиокомпанийӗн председателӗнче ӗҫленӗ, халӗ – "Хресчен сасси" Издательство ҫурчӗн директорӗ-тӗп редакторӗ.

Сергей Павлов 1991 ҫултанпа СССР Писателӗсен пӗрлешӗвӗн, халӗ Раҫҫей Писателӗсен пӗрлешӗвӗн членӗ. Вӑл – икӗ коллективлӑ сборник тата ултӑ кӗнеке авторӗ. Вӗсен шутӗнче – "Сӗлкӗш" роман (I–VI кӗнекесем), "Сиплӗ ҫумӑр" (1991) повеҫсемпе калавсен пуххи, "Серепе" повесть тата ыттисем те. Унӑн хайлавӗсене вырӑсла, азербайджанла, турккӑлла, тутарла куҫарнӑ.