Федоров Симон Федорович (Ҫуйӑн Хӗветӗрӗ) (27.06.1913-07.05.2002)

Фольклорист, поэт, СССР писателӗсен пӗрлешӗвӗн членӗ (1989), Тӑван ҫӗршывӑн Аслӑ вӑрҫине хутшӑнаканӗ.

1913 ҫулхи ҫӗртме уйӑхӗн 27-мӗшӗнче хальхи Ҫӗрпӳ районӗнчи Актай ялӗнче ҫуралнӑ.

Симон Федорович Федоров (Ҫуйӑн Хӗветӗрӗ) Ҫӗрпӳри икӗ класлӑ шкулта вӗреннӗ. Тӑван ҫӗршывшӑн пынӑ аслӑ вӑрҫа хутшӑннӑ, офицер пулнӑ. Отставкӑна тухсан ялти шкулсенче учительте ӗҫленӗ, Оренбург облаҫӗнче тата Чӑваш республикинчи финанс органӗсенче вӑй хунӑ.

60 ҫул ытла чӑваш халӑх сӑмахлӑхне пухнӑ, вӗсемпе усӑ курса чӑваш эпосне туса хатӗрленӗ. Ӑна кӗскетсе 1947 тата 1970 ҫулсенче кӑларнӑ. "Улӑп" эпос туллин (40 юрӑран тӑрать) 1996 ҫулта тухнӑ. 2009 ҫулта ӑна вырӑсла кӑларнӑ (А. Дмитриев куҫарнӑ).

Хӗрлӗ ҫӑлтӑр орден тата Тӑван ҫӗршыв вӑрҫин I степеньлӗ орден кавалерӗ.

2002 ҫулхи ҫу уйӑхӗн 7-мӗшӗнче Шупашкарта вилнӗ.