Шемекеев Виталий Дмитриевич (27.02.1937-15.06.2003)

Чӑваш ҫыравҫи, сӑвӑҫ, журналист, СССР писателӗсен союзӗн членӗ (1986).

1937 ҫулхи нарӑс уйӑхӗн 27-мӗшӗнче Комсомольски районӗнчи Комсомольски салинче ҫуралнӑ.

Виталий Дмитриевич Шемекеев профессипе техника училищи хыҫҫӑн металлурги заводӗнче ӗҫленӗ. Хусан университетӗнче вӗреннӗ. Комсомольски районӗнчи "Октябрь ялавӗ" тата Муркаш районӗнчи "Ҫӗнтерӳ ялавӗ" хаҫатсенче, ДОСААФ райкомӗнче, Чӑваш писателӗсен союзӗ ҫумӗнчи илемлӗ литературӑна пропагандӑлакан бюрора вӑй хунӑ. 1986 ҫултанпа СССР писателӗсен союзӗнче тӑнӑ.

В. Шемекеевӑн нумай сӑввине юрра хывнӑ. Вӑл "Пурнӑҫпа ӗмӗт" (1981), "Ҫӑлтӑрсен ҫӑлкуҫӗ" (1985), "Ҫӗр ҫинчех ман кил" (1988), "Ҫурхи юр" (1997), "Ах, йӳҫӗ-ҫке кӗвӗҫу куҫҫулӗ" (2008) кӗнекесен авторӗ.

2003 ҫулхи ҫӗртме уйӑхӗн 15-мӗшӗнче Шупашкарта вилнӗ.