Волков Александр Иванович (10.10.1946-16.12.1991)

Ҫыравҫӑ, журналист, СССР писателӗсен пӗрлешӗвӗн членӗ (1989).

1946 ҫулхи юпа уйӑхӗн 10-мӗшӗнче Элӗк районӗнчи Мӑн Этмен ялӗнче ҫуралнӑ.

А. Волков вӑтам шкул хыҫҫӑн И.Я. Яковлев ячӗллӗ Чӑваш патшалӑх институтӗнче, унтан И.Н. Ульянов ячӗллӗ Чӑваш патшалӑх университетӗнче вӗреннӗ. Ҫар службинче пулнӑ. Йӗпреҫ районӗнчи Березовкӑри вӑтам шкулта вырӑс чӗлхипе литературине вӗрентнӗ. Чӑвашрадиора, "Молодой коммунист" хаҫатра, Чӑваш кӗнеке издательствинче, "Тӑван Атӑл" журналта, Чӑваш телевиденийӗнче ӗҫленӗ.

Александр Волков ҫырнисем республикӑри тӗрлӗ хаҫат-журналсенче тӑтӑшах пичетленнӗ. Паллӑрах кӗнекисем: "Пирӗн ялсем" (1984), "Ахрӑм" (1989), "Пӗчӗк ялӑн пысӑк ҫылӑхӗ" (1990).

Ҫыравҫӑ 1991 ҫулхи раштав уйӑхӗн 16-мӗшӗнче Шупашкарта вилнӗ.