Никитин (Станьял) Виталий Петрович (01.01.1940)

Литературовед, поэт, публицист, таврапӗлӳҫӗ, общество деятелӗ, филологи ӑслӑлӑхӗсен кандидачӗ (1984), доцент, литература вӗрентӗвӗн меслетҫи, халӑх ӑсчахӗ, Чӑваш Республикин аслӑ шкулӑн тава тивӗҫлӗ ӗҫченӗ (2000), СССР журналисчӗсен союзӗн членӗ (1968).

1940 ҫулхи кӑрлач уйӑхӗн 1-мӗшӗнче Шупашкар районӗнчи Станьял ялӗнче ҫуралнӑ.

Виталий Петрович Никитин (Станьял) Ҫӳлтикасси вӑтам шкулӗнче, И.Я. Яковлев ячӗллӗ Чӑваш патшалӑх педагогика институтӗнче вӗреннӗ, И.Н. Ульянов ячӗллӗ Чӑваш патшалӑх университетӗнче аспирантура пӗтернӗ. 1970-1989 ҫулсенче унтах литературӑпа фольклор кафедринче ӗҫленӗ. Калининри ачасен ҫуртӗнчи, Каҫал, Шӑмӑршӑ, Шупашкар районӗсенчи вӑтам тата Шупашкарти аслӑ шкулсенче, "Молодой коммунист", "Коммунизм ялавӗ", "Советская Чувашия" хаҫатсенче, Чӑваш патшалӑх гуманитари ӑслӑлӑхӗсен институтӗнче тӑрӑшнӑ. Тӗпчев статйисем, тӗрленчӗксем, вӑтам шкулпа аслӑ шкул валли кӑларнӑ вӗренӳ кӗнекисем, программӑсем тата йӗркелесе е редакцилесе кӑларнӑ сборниксем 100 ятран иртеҫҫӗ.

Вӑл пуҫарнипе И.Я. Яковлев обществине (1988), Чӑваш таврапӗлӳҫисен союзне (1991), Чӑваш халӑх ӑс-хакӑлӗпе ӳнерӗсен академине (1992), Чӑваш наци конгресне (1992) йӗркеленӗ. Ку пӗрлӗхсем XX-XXI ӗмӗрсен чиккинче чӑвашлӑх ӗҫне палӑрмалла витӗм кӳме пултарнӑ.

Унӑн паллӑрах кӗнекисем: "Чувашский рассказ", "Чӑваш халӑх ҫыравҫи Денис Гордеев", "Петр Кудряшев: основатель мемориального музея чувашского поэта К.В. Иванова", "Слакпуҫ – сӑвӑ-юрӑ сӑпки", "1941-1945 ҫулсенчи чӑваш литератури", "Кӑрӑнкӑ кунҫул", "Сторона моя, Чебоксарская" (в соавт.), "Ӑраскал тӗпренчӗкӗ", "Мир чувашской культуры", "Живем судьбой и памятью народа", "Юрату йӗтесӗ".