Кабаков Геннадий Германович (13.06.1947)

Прозаик, таврапӗлӳҫӗ, Раҫҫей писателӗсен союзӗн членӗ (1994), юстици подполковникӗ (1992).

Вӑрмар тӑрӑхӗнчи Тикеш ялӗнче 1947 ҫулхи ҫӗртмен 13-мӗшӗнче ҫуралнӑ.

Геннадий Германович Кабаков Хусан университетӗнче юрист профессине алла илнӗ. Унччен малтан Совет ҫарӗнче В.И. Чапаев ячӗллӗ дивизире хӗсметре пулнӑ.

Вӑл – приключени-детектив жанрӗпе тухӑҫлӑ ҫыракан автор. Йӗркелӗх хуралӗнче тӑракансен пархатарлӑ ӗҫӗ-хӗлне халалласа, хӑй те пӗтӗм пурнӑҫне шалти ӗҫсен органӗсенче ирттернӗскер (следователь, аслӑ следователь, пай пуҫлӑхӗ пулнӑ, хальхи вӑхӑтра отставкӑри юстици подполковникӗ), чылай повесть, калав, очерк кӑларнӑ.

Паллӑрах кӑнекисем: "Ют юн" (1981), "Шанчӑк пӗтмен" (2004), "Шакал йӗрӗпе" (2009). Вырӑсла ҫырнисем те пур: "Тегешево - далекое и близкое" (2001), "Корни и ветви старого дуба" (2008), "Врата ко всем путям земным" (2009).