Федоров Георгий Иосифович (10.02.1942-09.12.2015)

Литература тӗпчевҫи, прозаик, филологи наукисен докторӗ, профессор, Чӑваш Республикин тава тивӗҫлӗ ӑслӑлӑх ӗҫченӗ, Раҫҫей писателӗсен союзӗн членӗ, Чӑваш Республикин Патшалӑх премийӗн лауреачӗ.

1942 ҫулхи нарӑс уйӑхӗн 10-мӗшӗнче Ҫӗмӗрле районӗнчи Патаккасси ялӗнче ҫуралнӑ.

Георгий Иосифович Федоров Хутарти вӑтам шкула тата И.Я. Яковлев ячӗллӗ Чӑваш патшалӑх педагогика институтне пӗтернӗ. Тӗрлӗ шкулсенче учительте, ЧАССР Министрсен Совечӗ ҫумӗнчи наукӑпа тӗпчев институтӗнче вӑй хунӑ. 1998 ҫултанпа И.Н. Ульянов ячӗллӗ Чӑваш патшалӑх университетӗнче ӗҫленӗ. В. Энтип, Хв. Уяр, А. Емельянов, Ю. Скворцов, К. Турхан тата ытти ҫыравҫӑсен пултарулӑхне тӗпченӗ. 250 ытла наука ӗҫӗ ҫырнӑ. "Художественный мир Хв. Уяра" (1991), "Художественный мир чувашской прозы" (1996) тата ытти кӗнекесен авторӗ. Вӑл ҫырнӑ повеҫсемпе калавсем, сӑвӑсем хаҫат-журналта тӑтӑш пичетленеҫҫӗ.

2008 ҫулта ӑна "Чӑваш литератури. 1940-1985 ҫулсем" кӗнекешӗн Чӑваш Республикин Патшалӑх премине панӑ.

2015 ҫулта ҫӗре кӗнӗ.