Тургай (Воробьев) Валерий Владимирович (17.04.1961).

Писатель, тӑлмачӑ, публицист, обществӑлла деятель, СССР Писателӗсен союзӗн, халӗ Раҫҫей Писателӗсен союзӗн членӗ (1992), республикӑри Ҫамрӑксен союзӗн Ҫеҫпӗл Мишши (1991), Пушкӑртстан Ф. Карим (2005) ячӗллӗ премисен лауреачӗ, Чӑваш республикин культурӑн тава тивӗҫлӗ ӗҫченӗ (1999), Тутар республикин тава тивӗҫлӗ ӗҫченӗ (2011). Украинӑри Чернигов облаҫӗнчи Остер хулин хисеплӗ гражданинӗ (1999). Чӑваш Республикин халӑх поэчӗ (2003).

1961 ҫулхи ака уйӑхӗн 17-мӗшӗнче Комсомольски районӗнчи Хырай Ӗнел ялӗнче ҫуралнӑ. Ялти вӑтам шкулта, Чӑваш патшалӑх университетӗнче, Мускаври ГИТИС ҫумӗнчи Л. В. Луначарский ячӗллӗ театр аслӑ курсӗнче вӗреннӗ. Чӑваш Писателӗсен союзӗн илемлӗ литературӑна пропогандӑлакан бюровӗнче, "Ҫамрӑк коммунист" хаҫатра ӗҫленӗ, Чӑваш Республикин Профессиллӗ писательсен союзӗн правлени председателӗ (2000-2008), 1996 ҫултанпа Ҫеҫпӗл Мишши ячӗллӗ ыр кӑмӑллӑх фончӗн директорӗ, "Хыпар" издательство ҫурчӗн тӗп директорӗ тата тӗп редакторӗ (2014-2015), РСФСР Писателӗсен союзӗн секретарӗ, "Дружба народов" литературӑпа художество тата обществӑпа политика журналӗн никама пӑхӑнман канашӗн редакцийӗн членӗ, СССР Писателӗсен союзӗн правлени членӗ пулнӑ.

Малтанхи сӑввисем 1976 ҫулта Комсомольски районӗнчи "Октябрь ялавӗ" хаҫатра пичетленнӗ. В. Туркай прозӑллӑ произведенисем те ҫырать, вӑл драматург та. Унӑн "Телейпе юнашар", "Ӑҫта эс, ҫӑлкуҫ?", "Каҫар мана" пьесисене Чӑваш академи театрӗпе ҫамрӑксен театрӗ хӑйсен сценисем ҫинчен лартнӑ. Валерий Тургай хайлавӗсене вырӑс, азербайджан, украин, латыш, итали тата ытти чӗлхесене куҫарнӑ. М. Карим, Г. Тукай, Р. Гамзатов, К. Кулиев, А. Кешоков, В. Колумб тата ытти писательсен хайлавӗсене чӑвашла куҫарнӑ. Паллӑрах кӗнекесем: "Ҫӑлкуҫ ҫути", "Шурӑ фарфор чашӑк", "Пурӑнатпӑр-ха", "Чунӑм манӑн, чунӑм", "Турӑ питӗнчи куҫҫуль", "Ку эпӗ – Валери Туркай!" тата ыттите.

Чӑваш Республикин Хисеплӗ грамотипе наградӑланӑ, "Чӑваш Республикин тава тивӗҫлӗ ӗҫсемшӗн" орден медаль панӑ (2012), Чӑваш Республикин Патшалӑх Канашӗн тав хучӗ панӑ(2016).

Награжден Почетной грамотой Государственного Совета Чувашской Республики, медалью ордена "За заслуги перед Чувашской Республикой" (2012), почетным знаком Союза писателей России "За заслуги в литературе" (2023). Имеет Благодарность Государственного Совета Чувашской Республики (2016)