Филиппова (Михайлова) Лидия Ивановна (23.05.1967)

Чӑваш ҫыравҫи, журналист, филологи ӑслӑлӑхӗсен кандидачӗ (2003), доцент, Раҫҫей писателӗсен пӗрлешӗвӗн членӗ (2003), Раҫҫей журналисчӗсен пӗрлешӗвӗн членӗ (1995), Чӑваш Республикин культурӑн тава тивӗҫлӗ ӗҫченӗ (2013).

1967 ҫулхи ҫу уйӑхӗн 23-мӗшӗнче Чӑваш Республикинчи Канаш районне кӗрекен Малтикас (Ҫеҫпӗл) ялӗнче ҫуралнӑ.

Лидия Ивановна Филиппова (Михайлова) 1974 ҫулта Ҫеҫпӗл вӑтам шкулӗн пӗрремӗш класне кайнӑ. Шкул пӗтерсен, 1984-1989 ҫулсенче И.Н. Ульянов ячӗллӗ Чӑваш патшалӑх университечӗн историпе филологи факультечӗн чӑваш уйрӑмӗнче журналистика енӗпе вӗреннӗ.

1989-1994 ҫулсенче Пушкӑртстан Республикинче тухса тӑракан "Урал сасси" хаҫатра куҫаруҫӑ, корреспондент, яваплӑ секретарь, редактор заместителӗ пулса ӗҫленӗ. 1994-1997 ҫулсенче – "Хыпар" республика хаҫачӗн вӗрентӳпе ӑслӑлӑх, культурӑпа наци политики пайӗн корреспонденчӗ. 1997-1999 ҫулсенче – "Чӑваш Ен" телерадиокомпанин Чӑваш радиовӗн информаципе публицистика кӑларӑмӗсен пайӗн редакторӗ. 1999 ҫулта И.Н. Ульянов ячӗллӗ Чӑваш патшалӑх университетӗнче ӗҫлеме тытӑннӑ. 10 ҫул "Ульяновец" хаҫатӑн тӗп редакторӗ, ЧПУн журналистика факультечӗн доценчӗ пулса тӑрӑшнӑ. Каярах – "Атӑл – Волга" Издательство ҫурчӗн "Тӑван Атӑл" кӑларӑмӑн пай редакторӗ. 2011-2016 ҫулсенче – Чӑваш Республикин Патшалӑх Канашӗн "Республика" хаҫачӗн директорӗ (тӗп редакторӗ). Халӗ редактор "Тӑван Атӑл" журнал редакторӗ.

Лидия Филиппова –13 кӗнеке авторӗ: "Чӑвашӑма ҫаплах мухтатӑп…" (2005), "Ан ӗнен, ан хӑра, ан ыйт... …" (2006), "Газете "Ульяновец" – 40 лет" (2008), "Мать. Татьяна Федоровна Иванова (куракова)" (2011), "Ректор – это призвание" (2012), "Ылханлӑ хура ҫӗмӗрт" (2012), "Пульсация = Чун таппи" (2015) т. ыт. те.