Дмитриев (Трер) Иосиф Александрович (27.06.1947-20.11.2018).

Театр режиссерӗ, актер, поэт, публицист, музыка критикӗ, Ҫеҫпӗл Мишши ячӗллӗ преми лауреачӗ (1997), Казахстан культурӑн тава тивӗҫлӗ деятелӗ, Чӑваш Республикин искусствӑсен тава тивӗҫлӗ деятелӗ (2012).

1947 ҫулхи ҫӗртме уйӑхӗн 27-мӗшӗнче Ҫӗрпӳ районӗнчи Йӳҫкасси ялӗнче ҫуралнӑ.

Матикасси вӑтам шкулӗнче 8 класс пӗтернӗ хыҫҫӑн Канаш педучилищинче вӗреннӗ, каярах Шупашкар районӗнчи Иккасси ялӗнче учительте ӗҫленӗ. Ленинградри театрпа кинематографии институтӗнче вӗренсе тухнӑ, унтан Мускаври ГИТИСра режиссер ӑсталӑхне алла илнӗ. Чӑваш ҫамрӑкӗсен театрӗнче, музыка училищинче, Чӑваш гуманитари ӑслӑлӑхӗсен институтӗнче, Казахстанра Акмола облаҫӗн вырӑс драма театрӗнче ӗҫленӗ. "Сеспель" илемлӗ фильмра (Киеври А. Довженко ячӗллӗ киностуди, 1970) тӗп роле вылянӑ.

И. А. Дмитриев-Трер сӑввисем республикӑри хаҫат-журналта, уйрӑммӑн тухнӑ кӗнекесенче 1970-мӗш ҫулсен пуҫламӑшӗнче пичетленме тытӑннӑ. Вӑл ҫавӑн пекех вырӑс, удмурд, швед, норвег, фин поэчӗсен сӑввисене чӑвашла куҫарнӑ.

2018 ҫулхи чӳк уйӑхӗн 20-мӗшӗнче вилнӗ.