Пехил (Кондратьев) Вениамин Васильевич (02.01.1955-24.07.2004)

Поэт, СССР писателӗсен пӗрлешӗвӗн членӗ (1990).

1955 ҫулхи кӑрлачӑн 2-мӗшӗнче Красноармейски районӗнчи Янкас ялӗнче ҫуралнӑ.

Вениамин Васильевич Кондратьев (Пехил) ялти сакӑр класлӑ шкула пӗтернӗ хыҫҫӑн Красноармейскинче вӑтам пӗлу илнӗ, каярах И.Н. Ульянов ячӗллӗ Чӑваш патшалӑх университетӗнчен вӗренсе тухнӑ. Унтан журналистика ӗҫне кӳлӗннӗ: районти "Ял пурнӑҫӗ" хаҫатпа радиовещани редакцийӗсенче ӗҫленӗ, "Ялав" журналта вӑй хунӑ.

Шкулта вӗреннӗ чухнех Вениамин Пехил сӑввисем республикӑри тӗрлӗ хаҫат-журналта пичетленнӗ. 1986 ҫулта унӑн Чӑваш кӗнеке издательствинче "Шӑнкрав курӑкӗ" кӗнеки ҫапӑнса тухнӑ, унта поэтӑн лирикӑлла тата философиллӗ сӑввисем, "Мир ялавӗ" поэми кун ҫути курнӑ. 1990 ҫулта "Янкас йӑмрисем", 2000 ҫулта "Мерттес" кӗнекисем вулакан патне ҫитнӗ. Унӑн сӑввисем тӑрӑх чӑваш композиторӗсем сахал мар юрӑ хывнӑ.

Поэт 2004 ҫулхи утӑ уйӑхӗн 24-мӗшӗнче Шупашкарта вилнӗ.