Лебедев Василий Иванович (13.01.1813-паллӑ мар)

Писатель, этнограф.

1813 ҫулхи кӑрлач уйӑхӗн 1 (13)-мӗшӗнче Чӗмпӗр кӗпӗрнин Кӑрмӑш уесӗнчи (халӗ Хӗрлӗ Чутай районӗ) Штанаш ялӗнче священник кил-йышӗнче ҫуралнӑ.

Василий Иванович Лебедев Хусанти тӗн семинарине 1836 ҫулта вӗренсе пӗтерни паллӑ. Ун чухне В. Вишневскипе тата В. Сбоевпа ҫывӑх паллашать. 1837 ҫулта пулас ҫыравҫа Питӗрти медицинӑпа хирурги академине вӗренме кӗрет пулас. Кайран вӑл ӑҫта ӗҫлени те, хӑҫан ҫӗре кӗни те хальлӗхе паллӑ мар.

Ҫыравҫӑн паллӑрах очеркӗсем: "Предания чуваш" (1848), "Звериная ловля у симбирских чувашей" (1850), "Симбирские чуваши" (1850), "О чувашском языке" (1852). Хӑйӗн сӑввисене вӑл чӑваш чӗлхи ҫинчен ҫырнӑ очеркра пичетленӗ.